Dili, 9 Maiu 2025 — Kompanhia CNCV, S.A hala’o atividade distribusaun uniforme seguransa ba pesoal seguransa hotu-hotu ne’ebé servisu iha munisípiu sira. Atividade ida ne’e iha objetivu atu hasa’e profesionalizmu no hametin seguransa ba tore Telekomsel nian ne’ebé importante tebes ba infraestrutura telekomunikasaun.
Atividade ne’e partisipa diretamente husi Menajer Seguransa CNCV, S.A ne’ebé mos fó orientasaun ba pesoal seguransa sira. Iha nia diskursu, nia hatete katak importante tebes atu iha disiplinu, responsabilidade no prontidaun iha servisu atu asegura tore telekomunikasaun husi ameasa hanesan roubu ka sabotajen.
Distribuisaun uniforme ida ne’e mos atu fó identidade ofisial ba pesoal seguransa sira iha teren, hodi fasilita identifikasaun no aumenta konfiansa komunidade ba sira nia prezensa.
Além de ne’e, atividade ne’e mos iha orientasaun badak kona-ba knaar no responsabilidade pesoal seguransa, inklui prosedimentu seguransa, relatóriu insidente, no koordenasaun ho autoridade relevante bainhira akontese problema iha área tore.
Ho atividade ida ne’e, espera katak pesoal seguransa CNCV, S.A bele hala’o sira nia knaar ho diak liu atu asegura tore Telekomsel, hodi garante servisu komunikasaun ba públiku kontinua lao ho seguru no laran diak.